Ragnar Hólm
„Illgjarnir öfunda og hata; þannig sýna þeir aðdáun sína.“ Svo mælti franski rithöfundurinn Victor Hugo og augljóslega er í þessu fólginn sannleikur. Þeir sem á einhvern hátt skara fram úr og sýna yfirburðahæfni, eru gjarnan á milli tannanna á fólki.
Nú er Sjónlistastjórinn á Akureyri, áður forstöðumaður Listasafnsins, Hannes Sigurðsson, að láta af störfum. Hann var ráðinn hingað norður vorið 1999 til að stýra Listasafninu og setti snarlega upp sýningar sem vöktu mikið umtal, mikla aðdáun og stundum heift – sýningar sem vöktu þó alltaf athygli á bænum okkar innanlands og stundum út fyrir landsteinana.
Þegar Hannes er spurður að því hvers vegna í ósköpunum hann sé að hætta og flytja alfarið suður, núna þegar hann hefur ekki lokið samningstíma sínum sem Sjónlistastjóri, þá svarar hann að það sé flókið til lengdar að búa bæði í Reykjavík og á Akureyri og vinna á síðarnefnda staðnum.
Öllum má ljóst vera að þetta getur varla talist meginástæðan fyrir brotthvarfi Hannesar. Það hefur staðið styr um störf hans nánast frá upphafi og skyldi engan undra; honum er veitt athygli fyrir frábært starf sitt hjá Listasafninu á Akureyri en sú athygli er stundum blandin öfund og óvild.
„Skugginn er dýpstur þar sem ljósið skín skærast,“ sagði þýska skáldið Goethe. Ef litið er yfir afrekaskrá Hannesar Sigurðssonar hjá Listasafninu á Akureyri og síðar Sjónlistamiðstöðinni, ef skoðaður er listinn yfir sýningarnar, flett í umfjöllun blaðanna og ef til vill gluggað í talsvert viðamikla bókaútgáfu sem hefur loðað við starfsemina, þá hljóta menn að viðurkenna að í annan tíma hefur ljós listsýninga á Akureyri ekki skinið skærar. Eðli málsins samkvæmt hafa skuggarnir á sama tíma verið djúpir.
Þeir sem láta mikið að sér kveða og skara fram úr eru ekki alltaf einfaldir persónuleikar eða auðveldir í samskiptum. Það gustar gjarnan af Hannesi Sigurðssyni og þyturinn á það til að rugla hárið á þeim sem eiga leið hjá.
Hannes hefur stundum mætt öfund og jafnvel óvild en síður en svo alltaf hlotið það lof og þær þakkir sem hann á þó skilið fyrir störf sín í höfuðborg hins bjarta norðurs.
Lofa skal það sem vel er gert.
Ég virði Hannes Sigurðsson fyrir einstaka hæfileika sem hann er gæddur. Ég flyt honum mínar bestu óskir um bjarta framtíð og þakkir fyrir vel unnin störf í þágu Akureyringa síðustu 14 árin.
Takk, Hannes.
Ragnar Hólm
Höfundur er innfæddur Akureyringur og áhugasamur um myndlist og menningu.
