Mikil ólga ríkir í Fjallabyggð eftir að bæjarstjórn sagði upp starfsmönnum í hagræðingarskyni í sumar í kjölfar stjórnsýsluúttektar. Kona sem segist nauðbeygð til að flytja frá Ólafsfirði í kjölfar skipulagsbreytinganna segir að töpuð störf kalli á brottflutning 23 Ólafsfirðinga auk þess sem kerfibundið virðist unnið að því að fækka menntuðu starfsfólki.
Með Héðinsfjarðargöngum voru skólar sameinaðir og fluttu þá þegar nokkrir frá Ólafsfirði að sögn Hrafnhildar Ýrar Denke nema og myndlistarkonu, Ólafsfirðings, sem á að eigin sögn ekki annan kost en að flytja með fjölskyldu til Reykjavíkur eftir að eiginmaður Hrafnhildar missti vinnuna í sumar. Þá segir hún að þegar snjómokstur hafi verið boðinn út fyrir nokkru hafi sjö íbúar flutt burt frá Ólafsfirði. Nýjasta dæmið og e.t.v. það umdeildasta kom svo upp í sumar þegar gerð var stjórnsýsluúttekt í Fjallabyggð. Haraldur L. Haraldsson hagfræðingur og skýrsluhöfundur komst þá að þeirri niðurstöðu að leggja ætti niður nokkur störf og breyta öðrum. Bæjarstjórn samþykkti en störfin sem voru skorin niður voru starf umhverfisfulltrúa og garðyrkjustjóra Fjallabyggðar, starf fræðslu- og menningarfulltrúa, starf íþrótta –og tómstundafulltrúa og starf umsjónarmanns íþróttamannvirkja. Ólafsfirðingar sinntu öllum þessum störfum og niðurstaðan er að 12 manneskjur yfirgefa Ólafsfjörð í kjölfarið. Hrafnhildur segir að alls megi færa rök fyrir að 23 manns hafi hrökklast frá Ólafsfirði á síðari árum vegna skipulagsbreytinga.
Hrafnhildur segir að auk þess sem gagnrýna megi stjórnsýsluúttektina, kostnað við hana og margt fleira virðist sem breytingarnar hafi nánast kerfisbundið miðað að því að fækka háskólamenntuðum starfsmönnum innan sveitarfélagsins. Þá séu vísbendingar um að niðurstaðan hafi verið pöntuð fyrirfram þar sem aðeins sum störf voru skoðuð en ekki önnur. Þá veki athygli að þegar ráðið var í nýtt sameinað starf sem varðar íþróttir, tómstundir og umsjón með íþróttamannvirkjum hafi sumir umsækjenda verið með mastersgráðu en maður með iðnaðarmenntun hafi verið ráðinn. „Ég sé ekki betur en hér séu ófagleg og vanhugsuð vinnubrögð í gangi. Allt fagfólk er látið fara.“
Hrafnhildur segir mikla reiði hjá íbúum Fjallabyggðar, ekki síst Ólafsfirðingum m.a. vegna þess að breytingarnar hafi aukið á ríg milli Ólafsfiðinga og Siglfirðinga. Siglfirðingar haldi sínu en Ólafsfirðingar tapi. Bæjarbúar eigi heimtingu á svörum.
Hlýtur að kalla á tilfinningar
Sigurður Valur Ásbjarnarson, bæjarstjóri Fjallabyggðar, segir vegna gagnrýninnar að um öll mannannaverk séu skiptar skoðanir. Samanburður Fjallabyggðar við önnur sambærileg sveitarfélög hafi sýnt mjög háan launakostnað sem hlutfall af tekjum og fleiri stöðugildi á hvern íbúa. „Fjárhagsleg staða sveitarfélagsins var og er sterk, en til þess að fjármagna nauðsynlegar framkvæmdir hefði innan tíðar þurft að grípa til kostnaðarsamrar lántöku ef ekki hefði verið hagrætt í rekstri sveitarfélagsins. Þess var gætt við afgreiðslu bæjarstjórnar að skerða sem minnst þjónustu við íbúa sveitarfélagsins.“
Bæjarstjóri segir að með aðgerðum í kjölfar stjórnsýsluúttektar hafi verið skapað svigrúm til þess að tryggja áframhaldandi sterkan fjárhag, fara í nauðsynlegar framkvæmdir án lántöku og í náinni framtíð sé stefnt að því að lækka álögur á íbúa.
„Árangur skipulagsbreytinganna hefur þegar komið í ljós við gerð fjárhagsáætlunar fyrir næsta ár en ekki er gert ráð fyrir lántökum á árinu 2014 þrátt fyrir fyrirhugaðar miklar framkvæmdir.“
Um það hvort reiði sé í samfélaginu segist bæjarstjóri aðeins hægt að svara því til að við slíkar breytingar skapist alltaf heitar umræður og tilfinningaþrungnar. „Meginmálið er að kjörnir bæjarfulltrúar tóku sínar ákvarðanir af varúð og af íhugun. Fjallabyggð mun samt sem áður hafa á að skipa vel menntuðu og hæfu starfsfólki til að sinna þeim verkefnum sem sveitarfélaginu er ætlað lögum samkvæmt.“
-BÞ
