Íshokkílandslið kvenna lék í dag fyrsta leik sinn í 2. deild heimsmeistaramótsins í Íshokkí. Landsliðið er að mestu leyti skipað leikmönnum frá Skautafélagi Akureyrar, þ.e. 13 leikmenn af 19 eru úr SA.
Viðureigning í dag var við lið Suður-Afríku og sigraði íslenska liðið með fimm mörkum gegn einu.
Thelma María Guðmundsdóttir, tæplega 17 ára stúlka úr SA, hóf þennan fyrsta landsleik sinn með því að skora mark eftir aðeins 40 sekúndna leik. „Ég hef ekki kannað hvernig þetta er miðað við fyrstu mörk leikmanna í öðrum íþróttagreinum, hvorki varðandi aldur né hve fljótt það gerðist, en leyfi mér bara samt að fullyrða að hér hlýtur að vera einhvers konar met,“ segir Haraldur Ingólfsson hjá SA.
Íslenska liðið virðist hafa komið til leiks af miklum krafti og ákveðið að keyra yfir andstæðingana strax í byrjun. Á fyrstu ellefu mínútunum skoraði íslenska liðið fjórum sinnum, áður en þær suður-afrísku komust á blað. Staðan 4-1 eftir fyrsta leikhluta. Ekkert var skorað í öðrum leikhluta og í þeim þriðja bætti íslenska liðið við einu marki. Lokatölur: Ísland - Suður-Afríka 5-1 (4-1, 0-0, 1-0).
Þetta er aldeilis flott byrjun hjá íslenska liðinu en nú fá stelpurnar eins dags frí og mæta svo króatíska liðinu á miðvikudag kl. 11.00 að íslenskum tíma.
Mörk/stoðsendingar
Sarah Smiley 1/2
Birna Baldursdóttir 1/1
Thelma María Guðmundsdóttir 1/0
Kristín Ingadóttir 1/0
Jónína Guðbjartsdóttir 1/0
Steinunn Erla Sigurgeirsdóttir 0/1
Guðrún Blöndal 0/1
Arndís Eggerz Sigurðardóttir 0/1
Guðlaug Ingibjörg Þorsteinsdóttir varði 16 skot í íslenska markinu.
Íslenska liðið fékk á sig 8 refsimínútur en það suður-afríska 14 mínútur.
