Það var stund milli stríða þegar ljósmyndari blaðsins skoðaði grunn nýja hótelsins við suðurhluta Mývatnssveitar sl. sunnudag. Hótelið stendur á hæð og má ætla að útsýni hótelgesta verði tilkomumikið.
Hótel Laxá sem nú er í byggingu í landi Arnarvatns í suðurhluta Mývatnssveitar er fyrsta hótelið af fjórum í undirbúningi í sveitinni. Þetta segir Pétur Snæbjörnsson hótelhaldari í Reynihlíð. Hann segir að flest gistihús í Mývatnssveit séu með 99% nýtingu yfir hásumarið og það séu blindir menn sem ekki sjá fjárfestingatækifærin í þessu. Öll verði nýju hótelin komin í fullan rekstur á næstu sex árum.
Hvert hótel verður að sögn Péturs 30-50 manna vinnustaður þannig að framboð á störfum mun stórvaxa. „Núna eru um 300 störf í ferðaþjónustu í Mývatnssveit á sumrin en með þessari aukningu verða þau um 500 bara í gisti- og veitingarekstri.“
Pétur segist nýja hótelið á Olnbogaás, Hótel Laxár mikið fagnaðarefni, enda sé mjög mikil umframeftirspurn eftir gæðaflokkaðri gistingu í Mývatnssveit á sumrin. „Nú þegar eru um 120 slík herbergi og með þessari aukningu fara þau í um 200. Ætla má að eftirspurnin í júní, júlí og ágúst sé nærri 500 herbergi á dag.“
Hins vegar segir Pétur að stóra málið sé að skapa störf á heilsársgrunni. „Það eru ýmsar vísbendingar um að slíkt sé hægt en það kallar líka á vissar kerfisbreytingar á til dæmis kjarasamningum þannig að orlof sé tekið utan annatíma. Með því mun þessi starfsemi styrkja mannlífið hér og bæta búsetuskilyrðin. Skútustaðahreppi er brýn nauðsyn á því að brottflutningur hætti og nýtt fólk komi og setjist hér að. Því fleiri og öflugri fyrirtæki sem fara í að markaðssetja svæðið og byggja það þannig upp að það þoli umferðina því meiri líkur á að árangur náist. Okkur veitir ekkert af því.“
Pétur er því afar jákvæður gagnvart hinnu nýju samkeppni en hann bendir á að það hafi vakið mikla athygli að engar athugasemdir bárust á öllu skipulagsferlinu vegna byggingar Hótels Laxár, ekki einu sinni frá Umhverfisstofnun, sem sæti nokkrum tíðindum. „Það verður fróðlegt að fylgjast með hvort hin verkefnin fá eins mjúka meðferð hjá umhverfis- og skipulagsyfirvöldum.“
-BÞ
