Eftir snjóþungan vetur og erfitt vor eru náttúruöflin enn að gera kylfingum í Golfklúbbnum Hamri á Dalvík erfitt fyrir. Hlýindin á Norðurlandi fyrir síðustu helgi urðu til þess að Svarfaðardalsá, sem rennur meðfram Arnarholtsvelli, flæddi yfir bakka sína og tók að renna inn á golfvöllinn um það bil sem síðustu holl voru að leggja af stað í meistaramóti Hamars.
Þegar komið var að því að spila seinni hringinn var komið mikið vatn á 1., 2. og 9. braut svo erfitt var fyrir kylfinga að komast um völlinn. „Brugðu sumir á það ráð að fara úr skóm og sokkum og vaða pollana á meðan aðrir kölluðu Jón vallarstjóra út á vallarbílnum og létu hann ferja sig yfir, þar sem ekki var hægt að komast þurrum fótum að fyrstu flöt og öðrum teig,“ segir á vef golfklúbbsins.
Fresta þurfti leik á föstudag vegna bleytunnar en þó tókst að klára mótið um helgina. Klúbbmeistarar urðu Heiðar Davíð Bragason og Ólöf María Einarsdóttir.
