Við erum báðar bölvaðir slúðrarar og viðurkennum það af fúsum og frjálsum vilja. Við förum oft með rangt mál og dæmum aðra í kringum okkur á einhverjum gróusögum og pískri. Eitt sem við gerðum (en teljum okkur nú vera búnar að gefa upp á bátinn) var að dæma kynsystur okkar útfrá þeim karlmönnum sem þær hafa kosið að sofa hjá. Einu sinni gerðum við það og notuðum orðið „drusla“ óspart. Svo lærðum við af mistökum okkar, fórum að hugsa út fyrir rammann, öðluðumst gagnrýna hugsun og fórum að velta því fyrir okkur – hvað er að vera drusla?
Við höfum alltaf staðið frammi fyrir þeirri ömurlegu tvífeldni í samfélaginu að ef karlmaður á marga bólfélaga að baki er hann sigurvegari, hann er mikils metinn og oftar en ekki upphafður sem einhver Don Juan hópsins. Hafi stelpur hinsvegar stundað hið sama eru þær dæmdar druslur, ódýrar og tilkippilegar mellur sem hægt er að ganga um eins og almenningssalerni. Skemmtileg dæmi um þessa drusluskömmun og tvífeldna kynlífsmenningu nútímans eru orðin sem við notum um kynfæri hvors annars. Jújú, það eru þessi venjulegu, typpi og píka en ef við förum aðeins ofan í kjölinn á viðurnefnum fyrir litla vininn og vinkonuna fáum við út að typpin fá yfirleitt tignarlegri og reisulegri nöfn eins og reður, limur, herramaðurinn, hrókurinn en píkurnar okkar fá orðskrípi eins og tussa, rotta eða almannagjá. Finnst ykkur þetta ekki tímaskekkja?
Þetta hefur okkur alla tíð fundist fáránlegt. Af hverju á kona að skammast sín eða afsaka sig fyrir að hafa sofið hjá þeim sem hún hefur sofið hjá – hvort sem þeir eru fimm eða fimmtíu? Kannski hafa sumar konur bara sterkari kynhvöt en aðrar, hafa aldrei verið í eða aldrei langað að vera í föstu sambandi eða kannski langar sumar konur bara að njóta kynlífsins í öllu sínu veldi með hverjum þeim sem lítur á þær hýru auga. Og hvað með það?
Nú komum við aftur að þeim grundvallarpunkti að ekkert sem við gerum sem einstaklingar kemur neinum við svo sem. Það kemur engum við hvað við borðum, hvernig við klæðum okkur eða hverjum við sofum hjá – nema okkur sjálfum.
Eru það ekki bara grundvallarréttindi okkar sem ungar, sjálfstæðar konur (og feministar í þokkabót) að fá að ríða þeim sem við viljum ríða? Er það ekki algjörlega okkar mál hverjum við hleypum uppá okkur, undir hvaða kringumstæðum og er það ekki okkar að takast á við afleiðingarnar af því? Við erum ekki að ýta undir neitt svall og saurlífi (öryggið á oddinn og allt það) en hugsum aðeins okkar gang.
Af hverju fá karlmennirnir alltaf bestu bitana, af hverju mega þeir sofa hjá öllum stelpunum inni á baði á B5 án þess að hljóta neinar skammir og verða jafnvel lofaðir fyrir það á meðan við stelpurnar sitjum með sárt ennið, ónýta samvisku og hundrað afsakanir á reiðum höndum eftir einnar nætur gaman með gömlum vin?
Allt snýst þetta um gott kynheilbrigði. Kynheilbrigði snýst ekki um að stunda bara kynlíf með maka. Kynheilbrigði snýst ekki um að hafa töluna þína sem lægsta. Kynheilbrigði fólks snýst um að stunda það kynlíf sem það vill, með aðila sem vill stunda kynlíf með manni, og gera það með viðeigandi vörnum. Það er ekki óheilbrigði að sofa hjá 100 strákum eða 100 stelpum, það er val hvers og eins. Það er hægt að velja að vera á lausu og sofa hjá svo til ókunnugu fólki. Það er líka hægt að velja að stunda bara kynlíf í samböndum með aðila sem maður þekkir og treystir. Hver og einn verður að finna sinn veg og standa við sína sannfæringu.
Það er leiðinlegt þegar stelpur dæma sjálfar sig eftir fjölda stráka sem þær hafa sofið hjá. Við höfum heyrt stelpur tala um að þær séu komnar upp í x tölu og vilji helst ekki að hún fari hærra. Hvern fjandann skiptir þessi tala máli? Það þarf enginn að vita þetta nema stelpan sjálf ef henni svo sýnist. Ef þú vilt ekki stunda einnar nætur gaman þá gerir þú það ekki. Ef þú vilt ekki sofa hjá hverja helgi, þá gerir þú það ekki. Það hefur enga merkingu nema þá að þín sannfæring fyrir þitt kynlíf er svona og hinsegin. Ef við gefum okkur að talan sé x há vegna kynlífs þar sem allir aðilar voru samþykkir, hvað er þá vandamálið?
Hafið þið einhverntímann heyrt karlmenn dæma sjálfa sig út frá þeim fjölda stelpna sem þeir hafa sofið hjá? Er þessu ekki gjörsamlega öfugt farið í þeirra samfélagi? Myndi strákur sem hefur sofið hjá 5 stelpum kannski skammast sín í kringum gaurana sem státa sig af þriggja stafa tölunni?
Með þessum pælingum erum við þó ekki að hvetja fólk til óeðlilegs kynheilbrigðis. Mergur málsins er að ef allir aðilar eru samþykkir, tilbúnir og meðtækilegir þá ætti ekki að vera neitt vandamál, engin skömm eða dómur heldur bara kynlíf í allri sinni dýrð.
Vissulega nota margir kynlíf sem einhverskonar vörn. Vörn gegn sínum eigin tilfinningum, kannski til að fylla upp í eitthvað tómarúm. Það er ekki kynheilbrigði. Það er vandamál sem þarf að koma í veg fyrir með almennilegri kennslu um kynlíf. Það þarf að kenna kynheilbrigði strax í grunnskóla. Það þýðir ekkert að loka augunum á það að ungt fólk stundar kynlíf, af því að ungt fólk stundar kynlíf. Það er staðreynd. Það má aftur á móti kenna þessu unga fólki að stunda ábyrgt kynlíf svo það geti fundið sinn rétta veg og gert það af réttum ástæðum, hverjar sem þær kunna að vera.
Að stunda kynlíf er okkur eðlislægt, okkur bæði til skemmtunar og æxlunar. Fólk getur vissulega verið með mismikla kynhvöt, haft ólíkar skoðanir og siðferði en kynlíf á ekki að vera böl. Kynlíf á að vera frelsandi, eitthvað gott til að njóta með manneskjunni sem er með þér hvort sem ást er í spilinu eða um er að ræða einnar nætur gaman eftir góðan sleik við barinn. Hvorki konur né karlar ættu að neyða sjálfa sig eða hvort annað til kynlífs. Enginn á að nauðga og enginn á að dæma fólkið í kringum sig fyrir hvernig hver og einn kýs að njóta kynlífs.
Við þurfum öll að hætta að dæma hvort annað vegna kynhegðunar okkar.
Ef við stöndum með sjálfum okkur, okkar eigin sannfæringu og treystum sjálfum okkur getum við sofið hjá hverjum sem er. Kannski hefðum við átt að sleppa því, kannski var það ekki gott kynlíf eða kannski var aðilinn ekki sá myndarlegasti í bransanum – en hey, hverjum er ekki sama? Af hverju ert þú að dæma mig?
Það var hans riddari sem reið inn í mína Almannagjá svo þetta er ekki þitt vandamál.
Silja Björk og Tinna
Pistillinn birtist áður á vefritinu Freyjur
