„Þeir sem vilja leggja af innanlandsflug til Reykjavíkur þurfa að koma með lausnir á neyðarsjúkraþjónustu við landsbyggðina. Þær eru eflaust fjölmargar. Til að mynda mætti koma upp alvöru spítala nærri Keflavíkurflugvelli, og nærtækara væri að koma upp tækjakosti, húsaskosti og starfsmönnum sem framkvæmt gætu þjónustuna á Akureyri. Tæknilega er allt mögulegt. Meira að segja gæti landsbyggðin orðið enn öflugri með Akureyri sem getumeiri þjónustukjarna. Þetta myndi meira að segja vera ákveðin lausn á dóminerandi borgríkisstefnu undanfarinna 30-40 ára“.
Þetta skrifar Einar Ben Þorsteinsson á bloggsvæði sitt í morgun en eftir að undirskriftarsöfnun gegn flutningi Reykjavíkurflugvallar hófst þann 16. ágúst sl. hefur umræðan um staðsetningu flugvallarsins verið mikil og margvísleg rök og mótrök komið fram. Mikið hefur verið rætt um hlutverk flugsins í neyðarsjúkrahússþjónustu en einnig hefur verið tæpt á hlutverki Reykjavíkur sem höfuðborgar og miðstöðvar stjórnsýslu landsins.
Nú hafa tæplega 60.000 manns skrifað undir áskorun til Reykjavíkurborgar og Alþingis á vefsíðunni lending.is en einnig er undirskriftarsöfnun á blöð víðsvegar hafin.
-SBS
