Sandra Hlíf Ocares héraðsdómslögmaður ræðir um barnaverndarkerfið og hlutverk þess samkvæmt lögum, löggjöfina í kringum það, málsmeðferð í barnaverndarmálum og valdmörk barnaverndarnefnda á lögfræðitorgi við Háskólann á Akureyri á morgun, þriðjudaginn 17. september kl. 12 í stofu M101.
Barnaverndarmál hafa verið í sviðsljósinu að undanförnu eins og svo oft áður. Sandra ræðir að auki um valdmörk og hlutverk sveitarfélaga og ríkis þegar kemur að skyldu þeirra varðandi úrræði fyrir börn og unglinga í barnaverndarkerfinu. Yfirskrift erindis Söndru er: Barnavernd, málsmeðferð og valdmörk barnaverndarnefnda.
Sandra Hlíf Ocares er fædd og uppalin á Akureyri. Útskrifaðist með meistaragráðu í lögfræði frá Háskólanum í Reykjavík árið 2010. Eftir útskrift starfaði hún sem framkvæmdastjóri þjónustusviðs Alterna Tel fram til ársins 2011. Vorið 2010 var Sandra skipuð formaður barnaverndarnefndar Reykjavíkur og gegndi því fram til 1. júlí 2013. Haustið 2011 tók hún við starfi fjármálastjóra og lögfræðings hjá tónlistar og nýsköpunarfyrirtækinu gogoyoko ehf. Sandra öðlaðist héraðsdómslögmannsréttindi vorið 2012 og hefur verið sjálfstætt starfandi lögmaður síðan þá.
-SBS
