Bílaklúbbur Akureyrar og Tengir héldu um helgina Minningarmót í Götuspyrnu á Akstursíþróttasvæði B.A. Mótið var til minningar um þá Pál Steindór Steindórsson og Pétur Róbert Tryggvason sem létust þann 05.08. 2013 í flugslysi á keppnisbrautinni.
Allur ágóði aðgangseyris, keppnisgjöldum og keppnisskírteinum rennur óskert í minningarsjóð og kann klúbburinn Akstursíþróttasambandi Íslands og Mótorhjólasambandi Íslands, keppendum, starfsfólki og áhorfendum fyrir þeirra framlag.
Keppnin fór fram í ágætis veðri þó komið sé fram á haust og tókst allt vel í alla staði, að sögn forsvarsmanna Bílaklúbbsins.
Maður dagsins var Grétar Óli Ingþórsson sem stórbætti eigið Íslandsmet í Trukkaflokki og fór með það niður í 7.08 sek. sem er stórkostlegur árangur á bíl, Ford F 150, sem vegur um 2,5 tonn. Greint er frá þessu á síðu Bílaklúbbs Akureyrar en þar má sjá úrslit í öllum flokkum.
Myndir: Karl Jónas Thorarensen
- Frá minningarmóti BA. Mynd: Karl Jónas Thorarensen
-SBS
