Tilboð í smíði skálabyggingar Vatnajökulsþjóðgarðs við Dreka í Öskju voru opnuð í gær, skömmu eftir að blaðið fór í prentun. Bygging nýs skála mun að kosta sextíu milljónir eða meira fyrir ríkið en kurr er meðal liðsmanna Ferðafélags Akureyrar (FFA) vegna framvindu mála hvað varðar skálavörslu og uppbyggingu á svæðinu.
Ferðafélag Akureyrar hefur rekið skála í Dreka um áratuga skeið en sagði nýverið upp samstarfssamningi við þjóðgarðinn þar sem vinnutilhögun og kjarasamningar landvarða sem land- og skálaverðir unnu eftir voru þannig að eftir að vinnutíma hinna opinberu starfsmanna lauk á kvöldin sköruðust línur við hagsmuni FFA. Ríkið greiddi FFA 100.000-200.000 krónur á ári í leigu eftir að þjóðgarðurinn var stofnaður en það þótti ferðafélagsmönnum í lægri kantinum. „En nú virðist allt í einu nóg af peningum til og það sem er verst er að uppbygging þessarar stofnunar á sér stað án samráðs og samvinnu við þá sem þarna hafa lengi starfað og hafa unnið gríðarleg starf í sjálfboðavinnu,“ segir meðlimur Ferðafélags Akureyrar sem ekki vill láta nafns síns getið.
Töluverð uppbygging hefur átt sér stað við Drekagil, enda er stöðin skilgreind sem hálendismistöð. „En á hvaða leið er Vatnajökulsþjóðgarður þegar hann telur sig ekki þurfa að vera í samstarfi við ferðafélög sem þarna hafa starfað árum saman,“ bætir heimildarmaður blaðsins við.
Bygging nýja skálans mun þýða nýjan og stóraukinn rekstrarkostnað. Viðhald verður ekki lengur unnið í sjálfboðavinnu og fellur þar kostnaður á ríkið sem ekki hefði þurft að leggja út fyrir ef meiri áhersla hefði verið lögð á samstarf að sögn heimildarmanns blaðsins.
Ekki náðist í forsvarsfólk Vatnajökulsþjóðgarðs við vinnslu fréttarinnar.
