Golfklúbbur Akureyrar hefur ráðið Ágúst Jensson sem framkvæmdastjóra en alls bárust 23 umsóknir um starfið. Ágúst hefur mikla reynslu sem nýtist í starfi en hann hefur að undanförnu starfað sem yfirvallastjóri golfvalla Golfklúbbs Reykjavíkur, en hefur einnig verið vallarstjóri Korpúlfsstaðarvallar og unnið á Kings og Queens golfvöllunum á Gleneagles í Skotlandi. „Við teljum okkur hafa náð í mjög góðan mann þarna því hann hefur víðtæka og skemmtilega reynslu og menntun, sem nýtist vel í okkar starfi“ segir Jón Steindór Árnason varaformaður GA.
Ágúst er menntaður viðskiptafræðingur frá Háskólanum á Akureyri og hefur auk þess lokið námi í golfvallafræðum frá Elmwood College í Skotlandi. Ásamt störfum sínum hjá GR hefur Ágúst sinnt þjálfun í yngri flokkum í körfuknattleik með hléum frá árinu 1997. Þá þjálfaði Ágúst meistaraflokk kvenna í körfuknattleik hjá Fjölni síðastliðinn vetur.
„Ég er virkilega spenntur fyrir þessu starfi og hlakka mikið til þess að takast á við nýjar og skemmtilegar áskoranir. Það er frábær aðstaða til golfiðkunar á Akureyri og það hefur verið vel staðið að málum þar undanfarin ár þannig að ég er að koma inn í gott og skemmtilegt umhverfi. Svo er mikil tilhlökkun innan fjölskyldunnar að flytja norður og setjast að á nýjum og skemmtilegum stað,“ segir Ágúst
Eiginkona Ágústar er Dagbjört Víglundsdóttir og eiga þau tvær dætur. Dagbjört starfar á fjármálasviði Vífilfells og mun halda því starfi áfram eftir flutning til Akureyrar. Ágúst hefur störf þann 1. nóvember næstkomandi.
-SBS
