Ég varð eilítið hugsi þegar ég las niðurlagsorð í viðtali við Geir Kristin Aðalsteinsson forseta bæjarstjórnar í blaði Vikudags í liðinni viku, þar sem hann sagði að núverandi meirihluti skildi ekki eftir sig neinar hallir, né að hægt væri að benda á einhvern skandal af þeirra hendi á kjörtímabilinu.
Er svo að skilja forseta bæjarstjórnar að fyrri meirihlutar hafi bara byggt hallir og jafnvel skandalíserað með einhverjum hætti ? Ég ætla að vísu ekki að elta ólar við umræður um skandal, þó svo að það gæti verið áhugavert að ræða það frekar. Þetta er allavega nýr vinkill í bæjarmálaumræðunni. Ég vil hins vegar dvelja við umræðuna um hallarbyggingar.
Það er deginum ljósara að L-listinn er á hröðum flótta þessa dagana undan umræðu um hallarekstur bæjarsjóðs. Menn reyna eftir fremsta megni að beina umræðunni um ástæður hallarekstursins frá alltof bjartsýnni fjárhagsáætlun og getuleysi meirhlutans til að takast á við nauðsynlega hagræðingu.
Undanskot frá skatti og hallarbyggingar fyrri meirihluta eru aðalástæður hallans að þeirra mati. Á sama tíma sést að hálfsárs uppgjör annarra sveitarfélaga sýna hallalausan rekstur og sum hver þeirra með góða afkomu.
Vissulega hefur verið byggt og framkvæmt á liðnum árum og hér gefst ágætt tækifæri að nefna nokkur dæmi þar um. Við höfum byggt tvo nýja grunnskóla og íþróttahús við annan þeirra, sem um leið er sérhæft fimleikahús og íþróttaðastaða fyrir fatlaða. Endurnýjuðum tvo knattspyrnuvelli og byggðum nýjan frjálsíþróttavöll. Við minntumst þess við vígslu þess vallar að 100 ár voru liðin frá fyrsta landsmóti UMFÍ sem haldið var hér á Akureyri. Eflaust hefði mátt hafa hlaupabrautirnar sex í stað átta, en ég sem formaður íþróttaráðs lagði ríka áherslu á að við byggðum völl sem gæti hýst stórmót í frjálsum íþróttum og það hefur gengið eftir og styrkt til muna frjálsíþróttastarf í bænum.
Við byggðum menningarhús. Við hefðum eflaust getað frestað því eða hætt alveg við það og þar með afþakkað mótframlag ríkisins. Við hefðum getað sleppt því að taka tónlistarskólann inn í húsið og haft það minna. En hvað með núverandi meirihluta, hefur hann ekki bætt í varðandi ný íþróttamannvirki t.d. með einum nýjum gervigrasvelli? Allt orkar tvímælis þá gert er, mælti Njáll forðum.
Við erum samfélag sem er í harðri samkeppni um íbúa og viljum skapa hér sambærilegar aðstæður og best gerist í öðrum sveitarfélögum og fjölga íbúum og auka skatttekjur. Samtímis höfum við búið að góðum og traustum rekstri bæjarsjóðs. Ytri aðstæður hafa hins vegar verið okkur mótdrægar síðsustu árin, eins og öðrum sveitarfélögum. Um margt hefur þó verið þyngra fyrir fæti hjá okkur en öðrum. Við höfum ýmsar óskráðar skyldur í ljósi stöðu okkar í fjórðungnum, sem við göngumst þegjandi við. Þar er aðallega um að ræða ýmsa sértæka þjónustu, sem ríkið hefur síðan tregast við að bæta okkur.
Um þetta er öll bæjarstjórn sammála og hefur litið á það sem sameiginlegt verkefni. Hins vegar hefur meirihlutinn því miður ekki ljéð máls á því að skoða frekari hagræðingu eins og ég lagði til við fjárhagsgerð síðustu tveggja ára. Við getum ekki skorast undan því verkefni, hversu erfitt sem það er. Það hefði líka farið betur á því að samþykkja tillögu mina um formlegt endurskoðað hálfsárs uppgjör á bæjarsjóði líkt og mörg önnur sveitarfélög gera. Það hefði fært umræðuna að kjarna viðfangsefnisins og menn hefðu vonandi hætt að tala í hálfkveðnum vísum.
Ólafur Jónsson
Höfundur er bæjarfulltrúi D-lista.
