Guðný Jóna Kristjánsdóttir fluttist burt frá Húsavík í kjölfar þess að samfélagið í bænum snérist gegn henni eftir að hún kærði jafnaldra sinn og bekkjarbróður fyrir nauðgun. Guðný Jóna kemur fram í Kastljósi á Rúv í kvöld þar sem sagt verður frá málinu.
Þegar dómur hafði fallið Hæstarétti yfir manninum var birt yfirlýsing í bæjarblaðinu á Húsavík þar sem á annað hundrað manns á öllum aldri og af báðum kynjum skrifuðu undir stuðningsyfirlýsingu við manninn. Álíka herferð er óþekkt á Íslandi. Hvorki fyrr né síðar hefur þolandi í kynferðisbrotamáli mætt viðlíka skipulagðri og opinberri fordæmingu og þarna. Þar á meðal var hún sögð hafa kallað nauðgunina yfir sig og að nær væri að kalla hana nauðgara heldur en manninn sem var dæmdur stuttu áður.
Í dag er Guðný 31 árs gömul en hún segir sögu sína í Kastljósi í kvöld. „Það tók mig langan tíma að vinna úr þessu öllu en það tókst. Að komast yfir þann tíma, sem þetta poppaði upp í hausnum á mér á hverjum degi. Í dag gerist það ekki nema annað slagið. Einna helst þegar sams konar mál eru í fréttum eða þegar einhver minnist á þessa atburði við mig af því að hann hefur heyrt um það og veit að ég er frá Húsavík, án þess að vita að þessi stelpa er ég. Í dag segi ég fólki bara eins og er. Ég er þessi stelpa frá Húsavík,“ segir Guðný meðal annars við Kastljósið.
Viðbót:
Hér er hægt að horfa á Kastljósþáttinn á vefnum
