Á Norður- og Austurlandi eru sennilega hvað flest tækifæri fyrir hendi þegar kemur að fjölbreyttum atvinnumöguleikum. Okkur hefur tekist vel upp með sumt en annað bíður þess að fá athygli eða umhverfi til þess að ná fram og dafna. Það sem helst hefur hamlað frumkvöðlum eða starfandi fyrirtækjum í að sækja fram er flókið regluverk, háir skattar og álögur.
Íslensk þjóð er framtaksöm, hugmyndarík og vel menntuð. Þennan auð þarf að virkja með öllum tiltækum ráðum og tryggja að menntakerfið vinni í nánu samstarfi við atvinnulífið þannig að þau tækifæri sem þar liggja séu nýtt til fullnustu.
Nauðsynlegt er að efla verk- og tæknimenntun í takt við þarfir atvinnulífsins auk þess sem efla þarf samstarf fyrirtækja, háskóla og opinberra stofnana um þróun og nýsköpun í þágu atvinnulífsins.
Huga þarf að vaxtagreinum í atvinnulífinu sem felast í frekari þróun á sviði skapandi greina, s.s hönnunar, þekkingariðnaðar, hugvits, listhandverks, kvikmyndaiðnaðar, menningar og lista. Þessar atvinnugreinar eru til þess fallnar að auka fjölbreytni atvinnulífsins, stuðla að nýsköpun og auka gjaldeyristekjur með verðmætum vörum, þekkingu og þjónustu til útflutnings.
Nýta þarf tækifærin sem felast í áframvinnslu þeirra hráefna sem unnin eru á svæðinu og ber þar helst að nefna ál og fisk.
Til þess að hægt sé að nýta þau ótalmörgu tækifæri sem fyrirfinnast í kjördæminu þarf að ríkja sátt um þá grunnatvinnuvegi sem skila hvað mestum verðmætum til þjóðarbúsins. Þannig verður að tryggja stöðugleika sjávarútvegsins til lengri tíma og eyða þeirri óvissu sem skapast hefur um hann með álagningu óraunhæfra gjalda.
Sjálfstæðisflokkurinn leggur ríka áherslu á að veita ferðaþjónustunni þann stuðning og bakland sem hún þarf til að eflast og dafna og verða einn af máttarstólpum atvinnusköpunar og gjaldeyrisöflunar fyrir land og þjóð. Tryggja þarf að þróun í ferðaþjónustu verði með þeim hætti að ferðamenn heimsæki allt landið, allt árið. Áhersla skal lögð á að þrengja ekki að ferðaþjónustu með íþyngjandi regluverki og skattheimtu.
Útvista þarf verkefnum ríkisins til Norðausturkjördæmis. Má í því sambandi nefna Vatnajökulsþjóðgarð og veiðistjórnunarsvið Umhverfisstofnunnar. Heimamenn er mun betur í stakk búnir til að sinna þessum málaflokkum, enda sérþekkingin til staðar. Norðausturlandi tilheyra gríðarlegar auðlindir, s.s orkuauðlindir, gjöfug fiskimið og hugsanlegar olíuauðlindir. Mörg atvinnutækifæri eru í tengslum við siglingar á norðurslóðir og þjónustu við Drekasvæði.
Á svæðinu verða til miklir fjármagnsflutningar ef horft er til þeirra staðbundnu skatttekna sem til verða og ættu þær í auknum mæli að verða eftir á þeim svæðum þar sem þeirra er aflað. Með því væri hægt að gera raunhæfar tillögur í samgöngu- og byggðamálum sem bætt geta aðstöðumun minni byggða til muna og svæðið allt yrði sterkari valkostur þegar kemur að búsetu, þjónustu og afþreyingu.
Ásta Kristín Sigurjónsdóttir
Höfundur skipar 3. sæti á lista Sjálfstæðisflokksins í Norðausturkjördæmi.
