Um helgina fór fram Atvinnu-og nýsköpunarhelgi í Háskólanum á Akureyri. Þar kom saman stór hópur af fólki með margvíslegar hugmyndir og vann að þeim alla helgina með aðstoð áhugasamra þátttakenda og sérfræðinga.
Við lok helgarinnar var svo völdum hugmyndum veittar viðurkenningar.
1. verðlaun fyrir bestu viðskiptahugmyndina og 400.000 kr. hlaut Anna Þóra Ísfold en hugmynd hennar gengur út á að framleiða sængur úr ull af íslensku forystufé. Anna Þóra hefur unnið að hugmyndinni í þónokkurn tíma og leitar nú að framleiðanda fyrir vöruna. Sængurnar hafa þann eiginleika að vera mjög hlýjar en hleypa raka í gegn svo að nætursvefn verði betri.
2. verðlaun og 250.000 kr. fékk verkefnið North Adventures en það er hugmynd þeirra Sverris Guðmundssonar og Ingólfs Árna Björnssonar, og gengur út á þá nýjung í ferðaþjónustu að bjóða ferðamönnum að keyra sjálfir jeppa um íslenskt landslag í fylgd með leiðsögumanni.
3.verðlaun og 150.000 kr. hlaut hugmynin 2Know. Það er vefsíða og snjallsímaforrit sem býður upp á spurningaleiki með ýmsum hætti sem nýtast við að miðla fróðleik til barna. Það eru þau Björn Gíslason, Herdís Björk Þórðardóttir og Matthías Rögnvaldsson sem standa að baki þessari hugmynd.
Sérstaka viðurkenningu sem athyglisverðasta hugmyndin og verðlaun upp á 50.000 kr. fékk verkefnið Ver um sæng. Það er búnaður sem einfaldar verkið við skipti á sængurverum. Það getur nýst á hótelum, sjúkrastofnunum og einnig hreyfihömluðum. Hugmyndina á Gunnhildur Ingólfsdóttir.
Viðurkenningu fyrir mesta árangurinn yfir helginan og 50.000 kr. verðlaun hlaut verkefnið Gosabretti. Það er verkefni þeirra Birgis Freys Sumarliðasonar og Ólafs Ringsted sem stefna að því að framleiða hjólabretti úr koltrefjaplasti sem gerir þau bæði sterkari og léttari en heðfbundin bretti.
Viðurkenninguna Val fólksins, sem þeir sem viðstaddir voru kynningu á verkefnunum völdu, og 100.000 kr. verðlaun fékk verkefnið Hvað viltu verða? Þar er um að ræða vefsíðu sem aðstoðar ungt fólk við að átta sig betur á hvaða námsleið henti þeim best út frá starfslýsingu, framboði á vinnumarkaði og áhugasviði. Það eru þeir Reynir Dagur Prebensson og Preben Jón Pétursson sem unnu að henni.
Hér má sjá fleiri myndir frá helginni sem teknar voru af starfsmanni Innovit
- Þátttakendur í atvinnu- og nýsköpunarhelginni
- Anna Þóra Ísfold tekur við verðlaunum og viðurkenningu
- Reynir Dagur Prebensson að kynna hugmyndina sína
- Ingólfur Árni Björnsson og Sverrir Guðmundsson
- Hugmynd kynnt
- Karen Malmquist að kynna sína hugmynd
- Auður Helena að kynna Góðan punkt
- Kynning á hugmynd
- Kristján Freyr Kristjánsson, framkvæmdastjóri Innovit
- Dómnefndin að störfum
- Hlustað á fyrirlestur
- Ráðgast við sérfræðing
- Unnið að verkefni
- Unnið af krafti
- Það er hægt að gera heilmikið á einni helgi
- Spáð og spegúlerað
- Þátttakendur að fara að kynna sínar hugmyndir í upphafi helgarinnar
- Upplýsingar og örfyrirlestrar brjóta upp vinnudaginn
- Anna Þóra Ísfold að kynna ullarsængina
- Þátttakendur í atvinnu- og nýsköpunarhelginni
- Anna Þóra Ísfold
