Á morgun, miðvikudaginn 10. apríl, mun Sigrún Sigurðardóttir lektor við heilbrigðisvísindasvið HA flytja erindi á málstofu í heilbrigðisvísindum undir yfirskriftinni: Þróun meðferðarúrræða fyrir þolendur kynferðislegs ofbeldis í æsku.
Málstofan hefst kl. 12:10 og fer fram í stofu M-102 í Háskólanum á Akureyri. Bein útsending verður frá málstofunni á vefvarpi Háskólans og þar verður einnig aðgengileg upptaka þegar málstofunni er lokið.
Þar mun Sigrún kynna niðurstöður úr rannsókn á meðferðarúrræðum fyrir fullorðna þolendur kynferðislegs ofbeldis í æsku. Markmið rannsóknarinnar er að öðlast þekkingu á því hvers konar meðferðarúrræði gagnast einstaklingum með slíka sögu og hvernig byggja skal upp slík meðferðarúrræði í framtíðinni.
Rannsóknin byggir á verkefni sem stóð yfir á Akureyri í 10 vikur, frá mars til júní 2011, á vegum Starfsendurhæfingar Norðurlands. Þátttakendur voru 12 konur á aldrinum 23-53 með sögu um kynferðislegt ofbeldi í æsku.
„Niðurstöðurnar benda eindregið til þess að verkefni sem þetta gefi mjög góðan árangur fyrir heilsufar, líðan, félagslegt umhverfi og virkni,“ segir Sigrún. „Allar konurnar voru í upphafi verkefnisins félagslega einangraðar, áttu við mjög flókin heilsufarsleg vandamál að stríða, þær voru með mjög brotna sjálfsmynd, treystu sér ekki í vinnu eða nám og hafði líðan þeirra veruleg áhrif á fjölskyldu þeirra og lífsgæði. Jákvæðan árangur mátti sjá varðandi alla þessa þætti hjá flest öllum konunum.“
„Það er mikilvægt að halda áfram að bjóða upp á slík úrræði í framtíðinni og halda áfram að þróa þá vinnu sem þegar hefur verið unnin,“ segir Sigrún en árangurinn var metinn með nokkrum prófum s.s. kvíða-, þunglyndis- og áfallastreituprófum, líkamsvitundarprófi, mati á heilsutengdum lífsgæðum, starfshlutverki og sálvefrænu mati.
Í verkefninu fór fram markviss þverfagleg meðferðarvinna og endurhæfing með líkamsvitund, jóga, sálfræðihóp, sköpunar- og tjáningarhóp, fræðslu, djúpslökun, sálfræðiviðtölum, sálvefrænni meðferð, viðbótarmeðferð, hreyfingu og líkamsþjálfun, persónulegri ráðgjöf varðandi mataræði og geðlæknisviðtölum. Árangur var metinn fyrir og eftir meðferðarúrræðin með nokkrum prófum en einnig voru viðtöl tekin við hverja konu fyrir og eftir meðferðarúrræðin og svo aftur einu og hálfu ári eftir að þeim lauk.
Rannsóknin mun geta haft þýðingu fyrir heilbrigðisstarfsfólk og annað fagfólk sem vinnur með einstaklingum með sögu um kynferðislegt ofbeldi í æsku, sem þarf úrvinnslu slíkra mála og mun því geta víkkað sjóndeildarhringinn við meðferðarvinnuna.
